Anak ko kalasahan

Anak Kalasahan
(Inah ha Malayo)

By: Hadznalyn Asakil


Tarasul iban daman
Tiyali ko ha lingkuran
Bismillah in tagnaan 
Salam kasilasa pa tiranan

Bismillah in tagnaan
Pasampay kaymu tuan
Ikaw kalasahan
Bigi jantung sin katan

Siyulat ko e-lilay
Ikaw in ha atay
Masakit kaku inah,
In malayuh kaymu hulah

Ako limayu,
kaymu magtayuh
Ha pasalan mo
Bisan lukoh-ligad hinangun ko

Ini in qadr ta kalasahan
Allah in kaingat sin katan
Isa-isa ha layuan,
Binin kaw ha apoh kalashan.

Utoh in ikaw malaggo na
Ha adlaw yan lima tahon na
In waktu maglabay adja
Ako ini masusa

Hi tangis ko na adja
Sakit atay limbang ko na
Bang adja utoh manjari na
Ako muwi,imipat kaymu sah.

Lapal ko ini dungugah
Ako ini hatiha
Kalasahan takaw ha dunya
Sambil ha adlaw akhira

Tagnah ka panaw mo,
Tagnah ka bissara mo,
Bisan pa biyaun tagnah kasulat sin ngan mo
Tanto wayrun,malayo ako

Dumatung in adlaw ako kahatihan mo
Bisan pa sab ako mabayah matun kaymu
Katan hinang ko,ha supaya madawhat mo
In katan kabayaan mo.

Hi sujod ko pa Tuhan
Bang man kaw halaum kakuyagan,
Malayo ha kasakit-sakitan,
Iban kabubugaan.

Iman,kasabar pyaruli ko
Adlaw hambuok ,ako muwi kaymu
Anak ayaw kaw magtangis,
Ako muwi da masamot,magbalik kaymu

Utoh tumtuma ini
Lasa ko kaymu pyaparuli
Sah unuhon ko ra kuman,isa-isa ko namimikilan
Hi amah mo halaum na karayawan,karnah sin Tuhan.

Ako sa in inah-amah mo,
Butasan dih ko mahinang kaymu
Amu na in alta ko,ha babaw dunya
Pa akhira in lasa ko

Magsarang-sukol ako
Ha apoh,amaun iban auntie mo
Yan sila siyasandigan ko
Kumapot ako kusog ha pasal kaymu.

Mahuli anak ko kalasahan
Simasandong sa kaw daran
Luha ko ini pagpahiran,
Manginduwaa pa Allah,bang man in ikaw lumagguh BAR-IMAN.