Pagmabugah ha maas

Pagmabugah ha Maas

By: Hadznalyn Asakil



Bismillah ko tagnaan,

Salam kasilasa pa tiranan,

Tarasol iban daman biyaktul panumtuman,

Pag-mabugah ha maas kiyamaw'duan.

Tarasol ini tungod pa maas,

Bang ko kitaon in masa bihaon tantu naluppas,

Pagmabugah pa maas way na timatas;

Halaum taas tingug,nagsisilawak.

Dungog kamu stori sin kaibanan,

Maas nawapat sadja halaum kasigpitan,

Sigpit sin daghal,hapdus'luha napakpak,

In mga ka'anakan,pa maas way na addat.

Unuhon na baha in baran mo,

Nawapat na adja hi inah iban amah mo,

Minuwi pa rahmah sin Tuhan,

Halaum sakit atay,kasusahan.

Ikaw anak,ayaw mag-gasud,

Tingug mo pa hanunuta,ayaw magpakusog;

Maas mo pagta'ati anduh tuod,

Sulgah mo ha huli,jannah maabot.

Sambuton ta in mga anak matugas O,

Daak hi inah amah,maka-itong maka-tu,

Sarang tang-danan kaw,sin tiyatayak kaymu,

Dagan nakaw buta-biso.

Yaon in kaibanan piya-pa-iskol marayaw,

Laung hi Amah utoh kamayah kaw,

Hi inah mo daran pagtxt-pagtawag bang naka'un nakaw,

Agi mo nag-i-iskul maraw pagkitah hati ha billiard'ran,ha sine,ha computer'an kaw.

Dih mo hikasipog in grade mo,

Tuyoh sin maas mag-paiskul kaymu,

Nakagraduate kaw puas sin doctorate mo,

Mabagsak adja ha pag panayaman mo.

Utoh-indah kaput kamu kasipugan,

Anduh pagmabugah ha maas baugbugan,

Kunsum-kuh'nisa sila manaw lugayan,

Ampa kamu tumangis,hal tungbas way nahinang.

Hangkan mga ka'anakan tungbas kamu,

Pa maas natuh,mangad'dati kita nyu,

Lasahon sila biyah way na makaliyuh,

Hasupaya in Allah,rahmah dihilan kita nyu.

Tarasol ko ini hiklad panumtum,

Bang way imamu,maaf pangayuon,

Bang limabi-kimulang,sunu'an sin ditun,

Mahuli maas anduh lasahun.

Wa badu wassalamu alaikom wa rahmatullahi wa barakatuhu.

Limbangan Ako

"Limbangan ako"
By: Hadznalyn Asakil

1.

Bismillah ko tagnaan,

Salam kasilasa pa tiranan,

Timarasol pasampay pa katan,

Kalu makadihil pamintangan.

2.

Dih ko sa hi tunay in ha pangatayan ko,

Dih hikatapok sin parasahan ko,

Bugah sin pikilan hiyarap ko,

Bang man kaingatan bang unu in jimatu.

3.

Katumtuman ko in bakas,

Namayah-mayah kaw kaku ima-apas-apas,

Pa iskul,pa bay,bisan pa liyangpas,

Miyabot na sambil nakapa-taw'maas.

4.

Kitah nakawin,na-halal duon,

Katan naglami-lami,nagkugkuyag way puhon;

Pa maas ta,lasyah napun,

Ha adlaw sin kita hambuokun.

5.

Miyabot man kita tiyahunan,

Ayaw puhon lasa ta naglugayan,

Magduruhon sambil naka-anak tuan,

Alhamdulillah,kita tiyakdil sin Tuhan.

6.

Pangannal ko katan dih mapinda,

Pag-ta'at ko kaymu,amu piyapa-unah,

Lasa ta duwa dih magbaluba,

Sah mayta bihaini kimugdan katuh lasa.

7.

Asubo ko kaymu,mayta unu nadusa ko?,

Ako nag-ta'at,nagkahagad kaymu,

Daing pa maas mo liyasa ko

Sah bihaini hati in gantih mo.

8.

Suratan ko hati in kakal'luahan,

Suratan ko in kawaan mo limbang,

Bisan bihaini in nahinang karayawan,

Way ako naghimangkan ako gantian.

9.

Na tiyaun kamu,nahambuok,

Uwi mo kamuh bukon na tibuok,

Lasa mo kaku natunga,natipok;

Hangkan adlaw mo bukon na tutug.

10.

Bukon tutug sambil pikilan mo,

Natunga na sambil budget mo,

Ganapan pa sin asawa mo batah-batah in O,

Dih na ako isturihan bang kita ma-uno.

11.

Sah bisan bihadtu lasa ko way nahagin,

Bisan pa dunhan in agi ko kaymu dugaing,

Bang kaw umasawa na,lumimbang,

Bugitan ako bisan dih nakaw tumabang.

12.

Sah bisan bihadtu in napikil ko,

Sabar-iman piyakusog ko,

Bang man sasat saytan dih umamo,

Ako tumutog bilang asawa mo.

13.

Hinangun ko katan bilang asawa mo,

Pagta'at kaymu mas palabihon ko,

Bang umabot in adlaw ko,

Way susun ha jantong ko.

14.

Mahang nakaw kamuh magguwa,

Sah hiyati ko bisan mata basah sin luha,

Napikil ko asawa mo batah-batah,

Sah bisan biyariin,bukon na san biddah.

15.

Lapit adlaw ako tumindog sumambahayang,

Hi tih'kad pa Allah bang man Iman ko kusugan,

Luha mapakpak,impit sin tangis ha ka-tigidluman,

Sah na adja hitangis in suratan.

16.

Adlaw dimatung,kami piyagkila,

Dih sa hiliyu bisan ako taga-laas na,

Lingkat namuh salih da ka-duwa,

Sah maray hati aun kitah mo kanya,yruon kaku lasa.

17.

Duon man kami na-hambuok,

Maka-iyan sab ako Masha Allah tuod,

Addat kitah ko matutuod,

Lasa niya kaymu biyah laggo bud.

18.

Bissara sin kaibanan piya-liyuh ko,

Suwaal nila kaagi "in Kalluwa nakaliyu",

Naka liyuh hal sin batah bahguh,

In asawa puon,makaulong kailo.

19.

Ha bissara niya,siyambagan ko,

Ayaw na kamu masusa bisan ya'sawahan ako,

Asal baran,kaingatan ko,

Tabukon in takdir sin Tag-ipon ko.

20.

Alhamdulillah ako nakara biyaini,

Bisan mahunit,masakit ha atay bigi,

Pi'kil ko in hawlihan,bat dih maglabi,

Kalu sungan sulgah,bisan sakit atay ha dunya bihaini.

21.

Mahuli wayna mahinang ko,

Hat ra ako asawa mo,

Sah anduh lasa pangayuon ko,

Hinanga in Parda'akan sin Allah kaymu.

22.

Parda-akan sin Allah,

Maka-duwa,upat manjari mag asawa,

Sah sarang bukon biddah in pagdah kanila,

Bang dih umamo,malingkat pa in isa-isa.

23.

Tarasul ko ini timuboh ha pikilan,

Maaf da kuman bang naka-haba in sulatan,

Sah kalu aun makawah panumtuman,

Pa mga bangsa Fatima kiyakal'luahan.

24.

Maaf da kuman mahuli,

Tarasol ko ini kalu hikapag-lagi,

Malaul man bassahun in tarasul ini,

Kalu patumtum tumutug ha jantung ka-agi.

Wassalamu Alaikom warahmatullahi wa barakatu.

Janji Nabaluba

Janji Nabaluba

By: Hadznalyn Asakil

Saran na in ako dih mo na kalasahan,

Nakalawag kaw dugaing ako giyantian,

Pangasuboh ko ha baran, "Mayta tuwan?"

Binin mo ako isa-isa,naka-pa abroad mayan.

In janji ta sin adlaw ka-ig mo,

Nagtangis pakaw,nag'lahsay sambil laway mo,

Suwaal binin mo "Anduh dayang magbalik da ako";

"Tagad adja kaw,tumipon ako,hipag pangasawa kaymu".

In tumtum kaymu iya'abay,

Dum-adlaw pipikil,sakit ha atay,

In kalasahan ko malayuh na,

Hulah naka dugaing,bang man siya dih magbaluba.

Sah janji mo nagbaluba,

Biyah sin badjuh,nabiyaning-namula,

Pangannal ko mabut in duwa'a,

Masamot maka-urol,makawin kita.

Sah landuh tuod piyagbago mo,

Biyah sapah,na dah anud in lapal mo,

Pagtext-pagtawag way na paruli mo,

Bat hati nakalawag na bahgu limbang mo.

Naka-ingat ako sin ikaw nakalawag na,

Biyah kaymu,ha abroad,hangka-hinangan mo ra,

Agun sa atay ko,baran nag'mulah,

In usog kalasahan ko,nakawah na sin iba.

Marayaw pa in limbang kiya-kawinan,

Daing sin tunang,pag-dupang way hinaran,

Puting landuh kiyakusugan,

Liyupa mo janji pa baran.

Sukod ta na hati in mabiyaini,

Butas tunang,way pag bali,

Maraw hati ko way nakawin,sakit atay dih maparuli,

Itungan sa in ako,bang na'asawa,giyanapan limbang ha huli.

Bihayaun ikaw malayuh na,

Butas na in lasa ta karuwa,

Kalu dihilan kaw rahmah sin Allah,

Suratan ko kaymu bugtuh, Alhamdulillah na hadja

Alhamdulillah,lil'lah in baran ko,

Nakatunang pa biyah usog kaymu,

Nalupa sambil janji pa maas mo,

Narupang nakaw ha lasa sin babae mo.

Katan pag tawbatan,fitnah ha baran,

Bunnal tuod bang lasa,sasat daing ha shaytan;

Kalu ini na in nadawhat sin baran,

Dusa dakula,pag-tawbatan ra kuman.

Alhamdulillah,nabutas kita,

Lasa mo kanya paruliha na adja,

Kalu suratan ko aun dumatung daing Kanya,

Harap pa maas ko,suwaal niya "Bismillah".

Tarasul ko ini nahinang ha pikilan,

Aun sumuhon maka-kugdan pa katan,

Ini in panumtuman way hinaran,

Kan utoh-indah malaggo parjaji'an.

Wassalamu alaikom wa rahmatullahi wa barakatu

.

Piyanglangan sin Tuhan

Piyanglangan sin Tuhan Allah

By: Hadznalyn Asakil

Assalamu Alaikom pa katan,

Saplag ha mga tiranan,

Maksud balik manalam salam,

Tarasul ko ini kiya mawduan Piyanglangan sin Tuhan.

Tarasul ko ini biyaktol,

Hipasampay pa mga bunjang,subol;

Hi lamud ko na hi bitu'anan umbol,

Sambil mga balo,budjang maas-subol.

Tarasul ko ini hal pagtunang,

Tunang-tunang sin subol iban budjang,

Kasilasa nila dayang tuwan,

In Allahu Ta'ala kiyalupahan.

Utoh' indah,mga kakasi,

Halli kamu sin everybody,

Pagtunang-tunang sin kamatauran;

Way kiyabaktul ha Agama Islam.

Ikaw usog madurog,

Dungog kaw sin lapal mang'baugbog,

Pagtunang-tunang piyanglangan,

Hi ka lummih parasahan.

In ikaw indah lingkatan,

Baran sarang ayaran,

Awrat ayaw pasaran,

Tunggal bana'mahram in makamat'tan.

Utoh dungog sa kaw,

Bang bunnal in lasa mo hati kaw,

Pa maas mo mama'id kaw,

Pagtunang-tunang tantu dih hikarayaw.

Ikaw isab indah kalasahan,

Pa balo ka atawa bitu'anan,

Baran mo ayaw pasaran,

Bisan paghulah,bakas kiya'labayan.

Kapot kaw sipog,

Awrat dih hikapag-ibog-ibog,

Bang bukon bana in umatod,

Istigfar kaw,dusa in maabot.

Bang kaw utoh,tantu malasa,

Pa maas sin babae,pangayu'on in lima,

Bang matabuk,mataymah nila,

Tantu halal in sungan,ha dusa makalayuh kita.

Ikaw indah halli kaw,

Usog bang bunnal malasa,ayaw mahanggaw,

Dan pakarayawan hi labay kaw,

Kan inah'amah mo maksurun kaw.

Ayaw duma magdakop,

Ayaw makapikil mang-uwih in maksod,

Malingkat pa sab iban maa'tod,

Bang hi utoh,limabay maksud,pa maas mo imalup.

Indah sanggah kaw,

Pa tuhan mo balik kaw,

Utoh panumtum kaw,

Iman mo ayaw pasasaw.

Ini in patum-tum ko,

Ako biyah da sab kanyu,

Nakalabay sin pagtunang-tunang pag-yanun ko,

Sah maraw pag-tawbatan tan'yu.

Tarasul ko ini biyaktol,

Maaf da kuman bang pangatayan nadugtol,

Ini iyusal,labay panumtum iyusol,

Kamu ra kuman in humati gumanap umusol.

Wa'badu Wassalamu alaikom warahmatullah.

Pad Siki hi Inah ko

Pad siki sin Mastal ko (Inah)

By: Hadznalyn Asakil

Katumtuman ko in masa yadtu,

Kami asibi pa ha lauman mo,

Isa-isa sin baran mo,

Nagtuyuh kamu,ha lima anak mo.

Katumtuman ko in naka-una,

Agun y pilak,y alta sin kita,

Liyukoh'ligad katan hinang na,

Hasupaya kami mga anak,sumanyang maka-iskul pa.

Magdagang ha canteen nahinang mo,

Sunuan pa sin suroy plastik,tiyatasan mo;

Bisan pa in ikaw ha laum gadji sin ka-mastal mo,

Bang isa-isa nagbuhi,pa mga anak mo.

Dimatung sa in adlaw gadji mo na-delay,

Namikil sin makaon,bisan adja hikapami candy,

Ha mga anak mo,bisan ullang-ullang y hikapami,

Hansul pangatayan,luha mag-una-huli.

Tiyatasan mo kamuh limayuh,

Agun hangkapitu mag-uwi kamu,

Gimba isuk isugan mo,

Bang man mga anak mo dih mahalo-bilo.

Alhamdulillah,ikaw in na inah namuh,

Bisan kami limaggoh,agun y amah namuh,

Kami napalaggoh mo,nag-tutuyoh,

Maraw pang'addatan,y na makapusoh.

Asal tuod in ikaw mastal marayaw,

Pang-hindu'e kamu ayaw magmahukaw,

Bisan maubos in pilak,y na masanaw;

Basta kami anak mo,halaum karayaw.

Alhamdulillah kami talos na,

Yari kami tumungbas kaymu sa,

Ikaw malaas-laas na,

Ha bay humali-hali,ha pag-usaha.

Sarang'surol kami anak mo,

Nabiyah kami bihaini,hal kaymu;

In tuyoh sin baran mo,bisan buhat bato;

Basta kami anak,ma'amu-amo.

Liyabayan mo dih hika-sipog,

Pangitaan sin kami,maka-ibog'ibog,

Hulas sangsah mu miyabut,

Diploma in gantih,Degree naabut.

Inah maaf da kuman,

Bang aun adlaw kami y hinaran,

Sakit atay kiyadihil ha pag-bulaugan,

Maaf' tawbat pa Allah Tuhan.

Bunnal tuod in jannah namuh,

Ha pad siki sin naglasa kamuh,

Nagdah siyam bulan,nagtuyuh;

Hi inah kakasi,ha pag-anak,napas agun mabugtuh.

Kalasahan namuh sa kaw,

Bisan kami lumaas,ayaw mahang'gaw,

Malupa kaymu,dih masasaw,

Hal sin jannah namuh,tantu ha pad siki sin Ikaw.

Wayruon man simanyang in pag-bana mo,

Hal sin hi amah,binin kita niyu,

Atay ayaw tumangis,luha pahiran mo,

Yari kami anak mo,nag-lalasa kaymu.

Waysa maka'tungbas bisan hisiyu,

Bisan laung ta,tuhon in amah mo,

Inah malaggu in rahmah piya-tuboh,

Luha ha mata,sarang dih tu'muh.

Tarasul ko ini patumtum,

Maksud marayaw,atay ungkatun,

Halgah sin inah ha kabuhi pikilun,

Pad siki nila,sarang siyumon..

Wa'badu wassalamu alaikom wa rahmatullahi wa barakatuh

SURATAN,Karnah Allah

(Suratan-1)

"Besh,hain na baha siya yadtu".Asubu hi Aira pa bagay niya.
"Hisiyu besh?".Asubu balik hi Hana kay Aira.
"Amin kababata mo ba,amin klasmyt mo daing sin grade 1 pa grade 6".sambag hi Aira
"Ah,oo sah besh,2 years na din in nkalabay,dih ko na kaingtan bang hawnu siya." sambung hi Hana pa bestfriend nya.Hi Hana iban hi Aira magpangtungod daing ha ama,kiyawa hi Aira sin maas hi Hana paiskulon ha tiyanggi,daing sin grade 4 hi Aira sambil nahinang na sila biyah kambal iban hi Hana,bang unu in aun kay Hana aun da sab kay Aira,nahinang tuod sila magbestfriend.
"Halaum sin duwa tahon besh,bang ako magkadtu pa capitol,daran in atud ko pa bay nila bat agun masuok da pa dan,sah dih ko na pagkakitaan".Istori hi Hana kay Aira hal sin bagay nya usog ha elementary hi Benrashier,amin usog kiyabayan sin bata2x nya pangatayan,mahugot in pag bagay nila,amuna in pagjurihon sila sin mga klasmyt nila partner2x halaum room karuwa,bisan sila nagbabayah karuwa y myabut in adlaw nagtunang2x sila.Amu adja hi Benrashier magsulat2x sin ngan nila duwa kay Hana ha tandawan sin room.Mabanus na din in sulat2x hi Benrashier kiyapara kan Hana.Landuh in bayah nila karuwa,amun pagtawagun puppylove sin kamaasan pasal sin bata2x pa sila.Hi Hana puas mayan sin elementary nila,nka-iskul siya pa private ha Notre Dame,hi Benrashier nka iskul ha Sulu high.
"Besh,sung kita kimita basketball play sin iskul namuh,kahati nakaw magcheck kami attendance". Sagina hi Hana kay Aira magpapaiban ha bagay niya pa capitol,hal sin Boys and Girls week sin entire school ha sug,kalagihan magpa-attendance bat lamud ha P.E grade.
"Na sung na kita,bat kita makauwi madtuy". Sambag hi Aira pa bagay.
Duon man ha capitol grandstand,naglalawag in duwa magbagay sin kalingkuran puas mayan nagpa check attendance,kimitah sila daih-daih.
"Ah,yadtu besh,aun kalingkuran,sung kita."laung hi Aira nagtudluh sin kalingkuran pa bagay.
Nagpapanaw hi Hana nagtutukko way niya kitah in usog naglilingkud ha taasan nila.Amura in kasampong hi Hana sin ilong paghammot mayan sin asuh sigah.Pinaka kalisuan hi Hana in usog nag-sisigah.Nakalingkud mayan,liyawag hi Hana bang hawnu in tao nagsisgah,Limingi pa kid pa kid sah yruon kitah hi Hana. Limingi hi Hana pa kataasan nila,In kuba2x hi Hana pagkitah ha bagay niya,amin pyagbibissarahan nila kaina iban hi Aira. Salta nalawa in pikilan hi Hana sin paglawag nya ha tao nagsisigah,amura in ka-atud niya,nalawa ha pikilan nya,bigla nya na-asip in usog nag-sisigah,hi Benrashier in usog.
"Ben,ikaw sayan."pamung hi Hana. Sah amura in kaatud hi Benrashier kay Hana. Amuna saini in babae kiyabayaan ko daing sin elementary.Sah duon mayan inig hi Benrashier in pangatud niya kay Hana,y nya iyasip. Halaum sin luman timukko hi Hana,sambil dimana minuwi pa bagay.
"Sung na kita besh muwi,mahapon na rin,malaggo tuod besh in piyagbago nya. Way na bisan ako iyasip.ubus mka turn-off nagsisisgah na din siya." Halaum sakit atay hi Hana.
"Marai sab besh,y nya kaw kiyakilahan."pangdayaw atay hi Aira pa bagay.
"Impossible besh,y ra man sab nagbago in dagbus ko,sah sari na ba,siguro sukod ko na pahalihun sin pagpikil kanya"' sambag hi Hana. Timulin in adlaw,in sakit ha atay hi Hana dimayaw na sambil yrun na sya nagpikil kan benrashier.

(Suratan-2)
Duwa Tahon na in limabay,ha gihtungan na sin 4th year high school hi Hana.Ha laum sin duwa tahon,kiyalupahan na hi Hana in hal kay Benrashier. Aun da sab mabayah kay Hana mga usog sah dih niya pag hatayon.Dimatung in adlaw aun nagkabayaan kanya usog daing ha gimba Danag hi Ibno.Sah pasal sin magulang usog hi Hana strikto,misan taga bayah da isab dih hi Hana makabaytah hal sin bugah niya ha magulang nya.Sambil dimatung in adlaw namayta hi Ibno maggawi in maas niya pa bay hindah Hana,magpangasawa.piyasampay niya pa pangtungod niya bagay hi Hana,hi Rena. Ha adlaw hambuok dumatung in mga tao.  Sah dimatung adja in adlaw piyagbissarahan ,sambil na duwa na tu in adlaw,yabut hangka pito,hi Hana halaum na sin huna-huna bang mayta hi Ibno y na nkalaus. Kita hi Hana in bagay niya,dih makatanam,yasubo niya.
"Renz,mayta y na nkalaus hindah Ibno ibn hindah anti nakakari pa bay". Asubu hi Hana halaum kuba-kuba mabugah siya sin bunnal in mga kiyadungugan nya stori ha kaibanan,
"Mabugah ako magbaytah Han,sah bagay takaw masakit da sab kku.Iban kaingatan ko dyungog muna in istori nila hal kay Ibno."laung hi Rena. "Huonon takaw Han,bunnal in dyungug mo,iyuwi hi Ibno sin babae ha kanila.In babae bakas niya tunang bago siya namayah-mayah kaymu,mag maaf da kuman.
Timuh in Luha hi Hana,y na nkabissara,timuytuy na siya pa bilik,didtu niya giyuwa in sakit atay niya pa bagay niya hi Aira.
"Besh,y na jimatu usog mabayah kku,katan maglayo,unu baha in aun ako,malas adja ako."Halaum luha hi Hana,biyah bata2x nagsumbong pa bagay.
"Besh,bata pakaw,aun pang-iskul mo,aun lingkat mo. Ayaw pasari in luha mo tumuh ha usog bukon deserve in tuh sin luha mo.panyabut kaw Besh.Alhamdulillah,y kaw nila napusoh,hati niya dih sila hikarayaw kaymu." Pangdayaw atay hi Aira pa bagay niya.
Naka-graduate hi Hana sin high school,bisan nagbaba in grade nya ha waktu aun problema nya,bigla nya biyawi ha last grading.sambil nkawa nya in mataas grade ha mga subjects nya.
Plano hi Hana sin bakas bang natuy in pag pangasawa kanya hi Ibno,dih na siya pa zamboanga mag-school kawaun niya in course Mastal ha tiyanggi. Sah hal nabugtu in suratan nila kay Ibno,nagtake siya ha zamboanga sin mga exam ha WMSU ibn ha ZAEC(UZ).puhon sin Allah,nkapass siya katan.Hambuok adlaw bagu pa zamboangan hi Hana,kita siya hi Ibno.  Nangayuh hi Ibno bsan 10min duma magbissara knya. Ha yrun unu-unu,miyayah hi Hana. Nangayuh ka-maaf-an hi Ibno sin nahinang,sin sakit atay kiya dihil nya ky Hana.landuh tuod in lasa niya sah maray bukon tuod sila suratan.In pangatayan hi Hana mababaun,iyampon niya hi Ibno.
"Asal in sakit atay mag ka-ig da,Alhamdulillah dihilan ako sin Allahu Taala pangatayan byaini.Bisan unuhon liyasa takaw karnah Allah.sah Alhamdulillah sukod ta bukon sugpat in suratan ta.Lasaha in asawa mo.Mahuli salam duwaa ra kuman,magsukol ha sakit atay." Himumungan hi Hana kay Ibno,sambil timaykud na siya.
Timulak na pa Zamboanga.

(Suratan-3)
Ha zamboangan .Nagbak na hi Hana iban hi Amah niya. Limaggu hi Hana agun mahang nya ra pagkakitaan hi amah nya hal sin lugay naka-asawa hi amah nya hika-ruwa dih na agun mag-uwi pa kanila.Ngan butas in maas hi Hana sah yrun sulat pasa,pagyanun. Balik Islam in inah hi Hana,mastal nakura ha gimba sin sug.lima sila mag taymanghud.Isa2x sin Inah hi Hana naglukoh-ligad hasupaya sila maka-iskul.Piyalagguh sila hi Inah nila aun pag addat pa maas,taymanghud ibn pa dugaing tao.Hangkan in inah hi Hana nagyan pa bana niya.
"Na asal takaw tuwan yanun,in anak mo yan ambuok budjang,dugaing in akkal ibn sin anak mo budjang magulang hi Haifa."agi hi Anti jamila pa bana. Hi Haifa kamagulangan hindah Hana,nakatalus na nag-iskul college,ha manila na nag-uusaha,nakura ha pharmacy,naka-lingkat daing kan Hana.Hi Haifa in kasuban hi Apah Jamiri.Pasal anak magulang amura in kiyatutugan nya tuod sin kabatah pa.favorite hi amah niya.Malayu in atay hi Hana pa amah niya,sah bisan biyadtu y hi hana nagtanum sakit atay bisan hi amah nila dih na sila pag uwiun ha sug.Nasanay na sila daing angay,hal sin hi amah nila sundalo.Ha lugay angay Mastal in kabayaan hi Hana,mabayah siya mabiyah kay inah nya.Lugay mayan hi Hana nabutas ha bestfriend niya bat kiyabin ha sug nag iskul pa high school,ballpen ibn notebook in bagay hi Hana.didtu niya katan hi pag sulat in sakit atay niya,kansyu2x tao.Hi Hana mataw-on sakit atay,bang kaya niya dih nya hibaytah bsan masakit siya. Duon man yan,nag-asubo na in amah hi Hana bang unu in kabaan niya course.
"Na unu ka in kawaun mo course Hana?" asubu hi Apah Jamiri pa anak.
"Teacher Pa."sambag hi Hana.
"Aw,mabayah kaw mabiyah kay mama mo,na sarang dimidtu nkaw ha sug." sambag sin Amah hi Hana,tingog mkabugah hal sin strikto da isab. Y nakasambong hi Hana.
"Biyaini na ba,gantian mo na in course mo,laung mo masub kaw ha color puti magkitah,na hawpuon ta, mag-Nursing na ba kaw". saghina sin ama.
"Na huon pa,sulayan ko na adja bang makaya". Ha y mahinang sambag hi Hana pa amah.
"Ayaw na adja maghuon,hinanga,parayawa in pag-school mo,singud kaw kay kakah indah Haifa mo." agi sin Amah hi Hana. Amuna in kalisuan hi Hana in pag-compare siya pa magulang niya hi Haifa.Sah bsan byadtu timango na adja hi Hana.
"In sha Allah Pa".tanguh hi Hana. Bang ha ingat ma-ingat hi Haifa daing sin ha high school ha star section siya.Wayrun problema nya ha school sah bang ha bay,duon na siya magkahilo,hal sin laung pagyanun broken family sila, y nya kiyalagguan in malasa sin amah.hangkan kiyahunitan siya mag-adjust sin byaun ha lawman na siya hi amah niya.ubus patiyuh-tiyuh kiyu-compare siya kay kakah indah niya.
Duwa tahon na in limabay,School-bay na adja hi Hana.Hal sin striktu hi amah niya ibn hi utoh nya Hairun,didihilan siya curfew sin pag-uwi,malate adja hangkarai million in explaination hi Hana pa amah.

(Suratan-4)
 Hambuok adlaw,nag-aangkas hi Hana ha magulang usog harap pa iskul ZAEC. Biglah na adja himundong in motor,aun diyah nagbissara hi Hairon usog ha taas service,dih agun makalingi pa taykud hi Hana pasal sin nakasideview siya nag-aangkas.Bahguh namaid hi Hairun ha usog,piyakila niya hi Hana.
"Munir,manghud ko tuwih,kakilahan mo pa?"asubu hi Hairun ha usog diyah niya nag-istori.
"Oo kakilahan ko,siyanaka hi Hana amon bata2x sisihpon pa ha sug?" uyum katawa hi Munir.
Iyangat hi Hana in o nya,tyu-uan nya lingi in ha taykuran,bang hisiyu in usog piyakila knya hi kah nya utoh. Nagbak in pangatud hi Hana ibn hi Munir.Bigla hi Hana kiyubah kubah,dih kaingtan bang myta byadtu in kiyananaman niya kay Munir.Malugay lugay na sab hi Hana nagkabayah ha usog,lugay daing hangay yrun nya kiyananaman in kubah2x ha atay nya. Mabanus da sab mabayah kay Hana ha iskul sah yrun nakakawa sin atay niya,agad na sin sambil bugah niya ky amah niya ibn ky utoh niya. Amura in katango sin o hi munir pagkitah niya sin pamayhuan hi Hana,hawpuon nya kiyalingkatan siya.Namaid na in duwa magtaymanghud,timuytuy pa iskul. Ha lugay sin dagan sin motor,naka-asubo hi Hana bang hisiyu in Munir yadtu kaina,bisan halaum kuba2x y nagpatilas hi Hana ha magulang niya.
"Kah Utoh,hisiyu in usog kaina,myta ako kakilahan niya?"asubo hi Hana.
"Dih mo kakilahan yadtu/,anak sadtu hi kakah Saif,amin pangtungod hi papa,bali anakun natuh sila ba,apoh hi papa."sambag hi Hairun pa manghud,nahilu sambil bang byarin in kapaglasya nila. naka-uwi na adja ha bay hi hana,masi-masi niya tiyatalih in dagbus sin usog kaina nkadihil kanya kuba2x,iban pag dumol hi Hana pa notebook siyusulatan niya.Ini in first tym nakasulat hi hana bukon sakit atay ha notebook niya.Huna huna hi Hana malugay na saini ako y nahaylan bihaini,mabugah aq baka dih na sab maging ok.Iban lasya namuh kunuh,dih mabayah hi mama bang lasya namuh da..sarang ko pungon in haylan ko kanya yadtu.Limabay na adja in bulan,y na nagkitae hi munir iban hi Hana. Hi Hana kiyalupahan niya na in dagbus hi Munir,sah bang niya pikilun in waktu kapagbak sin mata nila,pagkubah-kubahun masi hi Hana. Malainkan da sab kan Munir,malugay na in bayah niya madtu kindah apoh niya jamiri mamisita,agad na kitaun niya hi Hana,sah halaum bugah pa amah niya ibn apoh,piyuh-puh hi Munir in bayah niya kay Hana.

(Suratan-5)

Dimatung in adlaw,nasakit hi Apah jamiri,iya-yupot hi Hana in ama,bisan dih magkaun sin hinangan hi Hana in amah niya masi-masi ra in paghinang pagkaun-kawa pa amah.Siyandalan niya in sakit myta bihaini in pagdah sin amah niya kanya. Iban hi Hana nag-ipat in hambuok niya pa magulang,taymanghud niya daing ha amah hi Harima. Hi Hana in manghud babae ha katan anak hi apah jamiri ha 3 asawa niya. Hi Harima in pinaka favorite hi amah niya daing kanila ibn hi kakah niya Haifa.Lugay hi Hana,nkaduon kay amah niya,bisan hambuok yrun siya tiyawag indah,bukon biyah sin magulang niya hi Haifa iban hi Harima,mahanunut da kuman in pagtawag knla Indah hi amah niya. Sahbuh nagmumus hi Hana sin piyagkaunan niya,aun tao nagsalam ha lawang.
"Assalamu Alaikom." salam sin tingug usog ha guwa.
"Wa alaikom assalam."us-us hi hana pa tandawan kita bang hisiyu in simalam. Pag kitah niya hi apah niya Saif isa2x,iyukaban niya lawang.wala kitah hi Hana sin duwa tao in ha taykud lawang pasal sin us-us niya tiyawag hi amah niya sin aun tao,y niya kitah in iban hi apah niya Saif.
"Pa,aun tao bisita." Tawag hi Hana pa amah,ha tungod hagdan,pasal duwa pangkat in apartment ha southcom kiya didtuan nila.Miyuna na hi hana nimaug pa sala,simunod hi amah niya.
"Indah hana,ikaw hati yan.in laggo muna,daing hangay sisipon pakaw magkadtu kami pa tiyanggi."Juri hi Apah Saif kay Hana.
"Huon kakah." Tango hi Hana.Kakah in tawag niya kay Apah Saif bat bali pangtungod nila hikaruwa kunuh sah biyah niya ra agun amaun in kalaas. Nakapamata hi hana in usog iban hi Apah Saif. Y niya hati kiyasayuhan sin duwa tao in bisita nila,amuna anak hi Apah saif,Hi Munir.
Amura in kaatud hi Hana pa usog,daing kaina pa hati siya piyapandang hi Munir y nagbissara.kiya-nanaman na isab hi Hana in kuba2x biyah sin kubah kubah niya sin tagnah kakitah kay Munir. Hi Munir nag-iban kan amah niya namisita kan apoh niya Jamiri.
"Hana,timpla kaw kunuh kahawa kindah kakah mo."Daak hi Apah jamiri pa anak.
"Houn pa,nagpapasuh na ko tubig."sambag hi Hana kiyublaan sin tingug hi amah niya ha taykuran.
Naubus man nagpasuh,piyajamuh na hi Hana in mga bisita hi amah niya.Timulin hi Hana pa bilik
"magtawag da san hi Papa bang aun kagunahan,huna-huna hi Hana ha pikilan."
Daih-daih mayan,diyungog hi Hana in ngan niya,tiyawag hati siya hi amah niya.
"Hana,kari kaw kunoh".tawag hi apah jamiri
"Uy,pa". sambong hi Hana ,us us piyababa,kiyubah kubah.
"Kawaa in celpon number hi kakah mo saif,hati bang aun emergency mkatawag kamu kanila."suwaal hi apah jamiri
"Ay na Pah,y saini ako celpon." Sambong hi Saif pa pangtungod.
"Utoh,kawaa na adja in number hi Hana". daak hi Apah saif pa anak kay Munir.
Hawpuon ta dihil hi Hana in number niya kay Munir,Hi munir halaum uyum nakawa niya na in number sin babae kiyabayaan niya.

(Suratan-6)
Halaum pag txtsan hi munir ibn hi Hana,nangumusta hal kan Amah niya.
"Anti Hana,maunu-unu na hi Apoh jamiri nag-pa asubo hi amah."txt hi Munir,Anti in tawag niya kay Hana tandah sin addat pa inaun,bisan gaggat in pangatyan tumawag pa babae kalasahan.
"Ok-ok na sah aun sumuhon,magsakit in paa niya,magtaas in sugar niya.kahati nkaw in taga diabetes utoh Munir."sambag sin txt daing kay Hana. Ampa kiyahampatan hi Hana sin maglasyah sila ha tuhod,pa kaapuan ibn hi Munir.inaun siya bali daing ha paa agi sin maas nila.
Limabay 3 adlaw.Magsusung na in sakit hi Apah jamiri.Piyatwag niya hi Munir.
"apoh jamiri,myta yadtu?'asubu hi munir pagdatung pa bay.
"Na utoh bang manjari,dii naa kaw ha bay,mag iban ha mga manghud mo babae.kahati nkaw lugay hi Hairon nagboarding-haus dih na siya mkasud mari pa southcom."pamung hi apah jamiri. Hi hairun puas man yan hangka-tahun nka-stay kay amah niya,dih sila agun mag sulut,bat biyah da sab sin kay Hana malayo in atay hi apah jamiri pa anak niya magulang subol.
"Dii naa kaw mag-iban kanila,hi admit na ako pa hospital uwus bng kagamgaman na,pa sug kmi pagpa-ubat kindah anti mo."ganap bissara hi apah jamiri kay munir.
Hawpuon,nkadidtu na hi Munir ha apartment iban sin hi Hana,hi Harima ibn hi nadz,manghud usog hi Harima.
Kiyamattanan hi Munir in mga taymanghud hi Hana.agun hi Hana in maghinang sin katan,uwus in mga taimanghud niya piyapaguwa sin hi Hana in lisuan bang mag-asubu hi apah jamiri. Hi Hana na in mag-adjal pagkaun ibn maglanuh sin bay iban badjo sin katan. Ha ulong hi Munir tiyabangan niya na hi Hana ha hinang bay.Bisan hangka bay hi Munir ibn hi Hana,aun pagmabugah hi Munir pa Maas ibn apoh niya.ha sala siya magtug iban manghud usog hi Hana ha amah.Sambil in tawag hi Munir kay Hana napindah yrun na pag anti,napinda na pa Indah Hana.
"Ha dum ini,saksi in Allahu Ta'ala,kiyalawagan ko na in babae,makajukop sin usol ko ha dunya.Kiyalawagan ko na in tunga sin baran ko,amin babae lasahun ko sambil pa mugtu in napas ko in sha Allah.Ya Allah,pangayuon ko kaymu,bang man mapuso ko in atay sin babae kiyabayaan ko," pamung hi munir biyah nagbibissara isa2x.
Nakaguwa hi pah jamiri daing ha hospital,nagdecision sin pa sug mag pa-ubat.Nakapa-sug hi pah jamiri iban sin asawa hika duwa.Masi-masi hi Munir duon ha apartment,piyaminan siya hi apoh niya.

(Suratan-7)
Dimatung na hi apah jamiri ha zamboangan iban sin duwa asawa niya.Imabot hangka-pito sila didtu ha sug.Alhamdulillah ok na in baran hi apah jamiri.
Duon mayan,nakatilas in inah hi Hana kay munir,imabut man in adlaw nkapatown hi Hana ibn hi inah niya,duon na siya yasubo hi inah niya.
"Indah,mangasubo ako. Namayah-mayah hi munir kaymu?."asubo hi anti jamila pa anak. way naka sambag hi Hana.bang bukon tiyanguan niya adja hi inah niya.
"Ikaw mabayah da sab kaw?.asubu balik sin inah hi Hana.Ha luman y na nkabissara hi Hana.
"Indah,ayaw kaw magtapuk kku,bang aun bayah mo ha usog yaun pamaytah kaw,kakilahan takaw bang kaw maglasa ha tao.Pamung sin inah hi Hana.In inah hi Hana daran sila pagyanun,dih patapukon kanila,daing sin kabata nila yrun sila secret ibn hi kakah niya Haifa kan inah nila,makahati in inah nila.Baing hatihun hi anti Jamila pa mga anak niya.
"Nah bisan kaw dih mamaytah kaku,kaingatan ko babae da sab ako.sah na indah 2 tahon da kuman mag-graduate nakaw hi kakah mo indah nagtutuyuh kanyu ibn hi utoh mo,ayaw nyu luppasan in pangiskul nyu."advise hi anti jamila pa anak.Hi Haifa naghihinang na ha manila pagpass ha board exam nag-aapply pa abroad.Hi hairun maggraduate na ha tahon yan.
Ha lugay man kiyaulian hi apah jamiri,bahguh minuwi hi anti jamila pa sug diya niya magbissara hi Munir.
"Utoh munir,mag sarang sukol ako sin pag-iban mo pa mga anti mo."sarang sukol hi anti jamili kay munir.
"Wayra yadtu apoh jamila.".sambag hi munir.
"Na sah utoh uwi naa kaw pa bay,byah mangi na aturon sin nkalugay nkaw tuod dii,magtumtum na hi inah mo."ganap sin inah hi Hana. sambil kiyublit niya hi munir dahun magbissra pa guwa bay.
"Munir,hangkan takaw diya nagbissara mkahati nkaw kay apoh mo,bang in halaum pangatayan mo matutuod kay hana,pangayuon ko talus naa kamu mag iskul,duwa tahon da kuman."suwaal hi anti jamila kay munir ampa namaid.Hi Munir kimakawa course mechanical engineering. Ha atay sin inah hi Hana,maraw pa in paglayuon naa nila in duwa pra makalayuh ha fitna sin tao sambil fitna pa baran nila.
Hi Hana tiyawag sin amah.
"Hana,lugay ko yrun dii,dih da sab magsuok-suok hi Munir kay kakah Harima mo?asubo hi apah jamiri.
"Yruon da sab Pa."sambung hi Hana pa amah,nka-napas dakula hi Hana.Pangannal niya nkaingat hi amah niya sin mabayah hi munir kanya.bukon hati kanya nag-guni-guni kay harima tuwih.

(Suratan-8)
,Hi Hana tiyabuk niya in lasa hi munir,nkaingat na in maas hi Munir,iban inah hi Hana.
Nag-iyan in inah hi munir papa-agarun hi Hana pa bay,bat sab kakilahan niya tuod.
"Assalamu alaikom anti."salam hi Hana pa inah hi munir.
"Wa alaikom assalam,indah lanjal kaw."sambag salam hi anti mariam kan Hana.
Duon mayan nag-mamantakilya hi anti mariam,diya niya nagbissara hi Hana hal sin anak niya. Nag-stori hi anti mariam kay Hana.Na hi Munir,maaddat mag-maas,maulong magtaymanghud,y bisyu,in atay lansuk,malunok in pangatyan,maasipon,mabanus tao makasi knya,in short maraw tao hi munir.
Ha baytah sin inah hi Munir,gamman magsusung in lasa hi Hana pa tunang.
"Indah,maaf da kuman,bisan biyariin in bayah namuh manaw pa maas mo,hi kakah Saif mo nkapagbissara iban hi Papa mo,kalu nkaingat na sin hal nyu duwa."bissara hi anti mariam.
"Nag-iyan hi amah mo sin bang man kunuh in mga anak niya makatalus mag skul.".ganap hi anti mariam.
"Wayra sadtu anti,Alhamdulillah bang naka-pagbissara na hi papa iban hi apah saif hal namuh.in sha Allah pila ra kuman bulan mkaubus na kmi."sambag hi Hana.. Puas sin nasakit hi apah jamiri,nagboarding haus na hi Hana,hal sin dih makatatas sin addat hi amah niya knya,yagad na sambil nag-retired na hi amah niya.
3 tahon na in pagtunang hi Munir iban hi Hana,nakaingat na in mau-maas nila.bisan hi anti jamila dih mabaya hal sin lasyah nila hi munir,y na mahinang sin inah bat naglalasahi in mga kaanakan nila. Ha laum sin pag skul hi Hana nursing yaun na in magcapping,nagpinning iban naggraduate,hi munir iban hi inah niya in iban nag attend kanya. Kakilahan na hi munir sin mga klasmyt hi Hana.
Adlaw graduation hi Hana.
"Langgah." amuna in tawag hi munir pa babae kalsahan niya.
"Uy yhang."sambag sab hi Hana tawag pa usog kalsahan nya.
"Yrun gift ko kaymu unu2x,tupot amu ra lasa ko,kunsum kuhnisa makalaos na in maksud ko kaymu". suwaal hi munir kay Hana.
"Dahun ta na magbissara hi kakah indah ibn sin maas ta.Magreview na ako para ha board puas graduation."sambag hi Hana,halaum uyum bat ha susungun mahambuok na sila ibn hi munir.
Hi Haifa iban hi Hairun naka-uwi daing ha manila nag attend sin graduation sin manghud nila hi Hana.
"Na munir,papag-reviewhun ta naa hi Hana,jukop na in tunangan naa kamu,mag-usaha tumungbas pa maas nyu." tagnah bissara hi Haifa,byah agun dih mabyah sin magpangasawa hi munir.
"Kah kalu mkareview da sab siya bisan kami natitiyaun na."sambong hi munir.

(Suratan-9)
Yruon naka tuy in pag pangasawa hi munir kay Hana,piyangayuh sin magulang nag-pa iskul sin magreview hi Hana sin board ampa puas pagbissarahan in hal nila duwa.
Halaum sin 6 bulan review hi Hana para ha board exam,aun tym pag kubakubahun siya sin dih niya kaingatan. Bang yruon review hi Hana,magbisita siya pa bay sin amaun niya hi Saif.
"Langgah,duhuli na ba ako sin pagkaun ko,bang yan ako mapatay,dih na san ako makakaun sin kabaan ko."langug hi munir pa tunang.
"Biyah sab in ikaw ini,bukon maraw in langug muyan,daing angay kaw maglangug sin byaan". Hi hana y kiya amuhan sin langug sin tunang ha pagkaunan.
Ha laum sin 6 bulan,hi munir halaum na adja baid kan Hana.sah hi Hana dih niya pag hatayun in bissara sin tunang. Dimatung in ambuok adlaw. Hi Hana iban hi munir nagjujuri.
"Langgah,unu in masakit amin tao mamin,atawa tao hi bin?"asubu hi munir  kay hana.
"Unu na sab hati in kaymu yan?"sambag hi Hana.
"Na alangan amin tao hibin,bat in tao mamin excited siya sin kadtuon niya..hahaha."Katawa hi Hana nag answer.
Dimatung mayan in board exam,in support hi munir pa tunang,bat da dih kuba-kubahun ha exam..
"Panginduwaa ba kaw gah,makapass sakan,ikaw pa." agi hi munir kay Hana.
Na puas in board exam.Dih parin mabaya in mau-magulang hi Hana magbana siya,in agi hi Haifa pakadtuon siya pa manila papag hinangun ubus mag-abroad,harap na din pa dubai hi Haifa,nkawa siya ha malaggu hospital didtu.
"Urol nakaw mari pa manila Hana,ayaw naa magbana yan,bata pakaw."txt hi Haifa pa manghud.
"Kah indah malugay na kami iban hi munir,dusa na adja in makawa namuh,tumungbas da ako bisan aun paghulah ko."sambag sin txt hi hana pa magulang.
"Dih ako mabayah,."sambag hi Haifa.
wayna nabassa hi Hana in txt ha sabab kiyawa hi munir in celpon niya,nabassa hi munir katan in txt.Miyugah hi munir hi layuh kanya hi Hana,piyagtagaran niya in adlaw maubus in board ubus biyaun dih na sab matuy in pag asawa niya ha babae kalashan. Diya hi munir nagbissara in maas niya na pakadtuon,papanawun na.
"Inah,anduh bang kamu maulong pa kaku,panaw na kamuh kindah apoh jamiri." halaum susa hi munir iyan in inah.
"Anak,agun saini yrun kita nkatagama malaggo,paygay hi Hana talus pang-iskul,Nurse pa,sukatan kita hi apoh mo jamiri malaggo."agi sin inah hi munir.
"Akuhun ko bisan pila million yan inah,basta maasawa ko ha masamut hi Hana."agi hi Munir.
"Maytah bakaw nag-us-us yan sin bata pa kamu?asubo hi anti mariam.
"Inah,dih san hi kapag bata atawa maas in kamatay,mabugah ako mahinang dusa in pag tunang ko kay Hana.fitna na malaggo in magtunang2x. iban inah,,ha susungun makabin ako alta kanyu."explain hi munir pa inah.
"Asal san in alta utoh,dih mara mapatay."agi hi anti mariam halaum huna-huna mayta mga hi munir biyaini magbissara.
"kiyaingatan ko inah,hangkan sah mamin ako alta kanyu.duhuli nyu na in kabaan ko."pangayuh hi munir pa maas.
Nakapila na biyalak hi munir dahun mag-agad hi Hana,sah dih siya mabayah madah sipog in tunang niya ibn mga maas niya.Hangkan tiyagaran niya katan adlaw dumatung in siya makasakat pa bay,mkapangasawa ha dan mabuntol.
Bisan dih mabayah in duwa magulang hi Hana iban sin Inah.Tiyuy hi Munir in pag pangasawa pa tunang. Nagpangasawa in maas hi munir madtu kindah Apah jamiri amah hi Hana. Ngiyanan maglasya da,tiyabuk sin amah hi Hana in pag-pangasawa.Way nasah in inah hi munir syukatan sila tungah million sin maas hi Hana.Diyah hi apah jamiri nagbissara in kamagulangan hi Haifa hal sin maksud kay Hana.Hi hairun nkatulak na pa saudi arabia. Ha dugal sin atay hi Haifa y niya iyasip in manghud hi Hana. Timulak na adja hi Haifa pa dubai yaruon unu ha manghud. Amura in bissara piyamin hi Haifa ha manghud.
"Na Hana,bang yan in pinih mo magbana kaw,daing sin mag-usaha,na kusugih in kid mo,unu-unu maghappen kaymu puas na kmi.yan na in bana mo.ayaw kaw sumuok kmu mangayuh unu2x.pinih mo yan natatasi." bissara mahuli tibuok sin magulang hi Hana. Hi Hairu amin masuok kan Hana,yastulan da sab kanya.

(Suratan-10)

To be continue

Iman mo Ayari

Iman mo Ayari

By. Hadznalyn Asakil

Tarasul ko dungugah niyo,

Bismillah tagnaa sin ako,

Sumalam-salam magbalik kanyu,

mga kakasi ha Agama sin ako.

Tarasul ini hal pag-iman,

Ganapan ko sambil sambahayang,

Sunuan pa hal sabar tuan,

Ha babaw dunya,ini kalagihan.

Pag-iman mo ayaw pasari,

Bukon kunsum-ku'nisa aun paghali,

Ibadat kaw taymanghud,

Pa Allah tumumtum,sumujud.

Bang aun dumatung problema,

Sang'gah kaw pa Allahu Ta'ala,

Manuntut ilmuh kanya,

Way maka-paratsaya bang bukon Siya.

Pag-iman mo ayari,

Bisan pakaw makakitah malingkat babae,

Pangatud mo hawiri,

Malingkat pa in semento,tukkoh kaw makajari.

Ikaw sab indah salih da,

Bisan kaw naka-hijab-niqab,putos sambil lima,

Bang in hammot mo,make-up sin mata,

Labi pa daing ha artista.

Bukon sa ini pasal hi utoh,

Bukon sa ini pasal hi indah,

Tarasul ini patumtum ha katan,

Lamud sambil bata-bata,kamaasan.

Sunu'an ta hal sambahayang,

Lima waktu,subay pag-ta'atan,

Way sa nakabutang ha Qur'an,

Sarang adja juma'at ampa kita ma-niyat.

Pag-ayil mo ayari,

Bukon adja pigsik-pigsiki,

Sambil badjuh mo lanu'e,

Awrat mo utoh-indah tampani.

Indah,utoh ikaw pang-lawag ilmo,

Bukon sa' ilmoh,hipag-lilimoh,

Amun laung ta mga magic,palmanis makabugtuh,

Hikasakit,hika-inlove sin mga amoh.

Ilmoh pagyanun sin kama'asan,

Mara mo sambil pa kamatayan,

Amin tampal sin ikaw ha,abi narkah jahannam,

Hasupaya Jannah in kahulugan.

Iman iban kasabar dii ha dunya,

Ha adlaw mahuli karayawan mo ra,

Bang biya'riin in panumtum pa Allah,

Da'akan Niya,dihilan mo importansiya.

Mahuli tarasul ini patumtum,

Muna-muna pa baran sin nag-baktol,

Kalu dungugon in lapal sin ako,

Maaf da kuman bang y naka-amu.

Wassalamu alaikom warahmatullahi wa barakatu.