Pagbatih ko

"Pagbatih ko"
By: Hadznalyn Asakil

Ka'bah pag batih ko,

Ikaw in tiyatali ko,

Aun pa baha sungan mo,

Hikarayaw sin baran ko.

Kahabah pagbatih ko,

Ikaw in pipikil ko,

Agun tumangis in atay ko,

Mayta bihaini in dihil mo.

Mabanus in malasa kaymu,

Aun sumuhon magkakawah mo ako,

In mga sila limasah kymu,

Kiyalupahan na in waktu.

Marayaw kaw dahun magbagay,

Marayaw kaw bisan unu sangay,

Ka'amuhan in katan kaymu,

Magkalawah mga ha sayuh.

Mabanus in manjari mo hi dihil,

Yaon na bisan niyawah kaymu hi ukil,

Bang man lasa mo kanila dih mahalin,

Bang man sila kaymu dih mahagin.

Katan sila kaymu nahaylan,

Pasal sin lingkat mo daing ha katan bulan,

Sahaya mo simisinglab,

Katan sila na-inlove.

Adlaw-adlaw pagbatih ko,

Mangindu'aa adja ako,

Bang man ako dih lumasa kaymu,

Kalupahan in Tag-ipon ko,

Panginduwaa ko agad sambil ka-tawtaymanghuran ko,

Taymanghud ha agama Islam,

Bang man kami dih mahaylan,

Sila "DUNYA" kiyalasahan.

Wa' badu wassalamu alaykum wa rahmatullahi wa barakatu

Anak Ilo Part II

Anak Ilo Part II

By: Hadznalyn Asakil

Salam kakasi,yari nagbalik ha tiranan

Kissa hika-ruwa yari tiyagnaan

Anak ilo way maas nila tuwan

Luha ko limigid  bang pagkatumtuman.

Aun ini duwa magtaymanghud,

Usog2x iban babae makakugkug,

Amah nawapat sin lima tahon in anak babae,

Simunod in inah nawapat ha pag anakan ha usog manghud.

Nawapat in duwa maas nila,

Wayruon na maka-ipat amura amaon nila;

Amaon daing ha inah in nag-ipat kanila,

Limugay mayan,amaon naka-asawa na.

Naka-asawa in amaon way limugay,

Dih na kamu istorihan bang unu in langay,

Asawa sin amaon limugay-lugay,

Dih makalawag anak,bisan unu ubat dih hi angay.

Dih mayan makalawag anak in babae,

Bana tiyawag diya nag-istori,

Iban pag iyan anduh kakasi;

Dih ako mabayah aun bata2x,sila pa-iga die.

Amaon namikilan bang unuhon in duwa bata2x,

Wayruon na saini maas iban lasya,

Makaulong ampa sab asawa makabugah,

Bang maka'ingat way piyaig in mga bata.

Limugay man ha pagtalian,

Amaon pikilan siyud shaitan,

Kiyadtu in kubol sin taymanghud iyukab,

Bata2x karuwa liyuon ha kid-kid haraig sin mayat.

Amaon minuwi na pa bay,

Asawa kiyugan wayna hibuk sin bay.

Amaon wayna susa asawa makug na,

Dih niya kaingatan ini na in kamula kanila.

Tao nagjajaga sin kakubulan, 

Aun siya ini pagkadungugan,

Tuh adlaw na yaun aun kiling2x magkatingug halaum sin kubol,

Wayna katanam timawag police,iyukay in kubol.

Nakalih mayan in kubol,

Tao iban police kiyub'laan sin kita ha kubol,

Duwa bata2x naglilingkud, magulang amura in ka angdul,

Ha manghud usog2x anduh makahansul.

Kapulisan himansul kabataan kiyawa,

Iyasubuh in magulang bang unu in kimugdan,

Mayta sila nakapa-kubol lupa kiyatabunan,

Hisiyu in tagka hinangan.

Babae magulang makabissara,

Bisan pa sab bata2x mamuting dih mahinang nila,

Amura in agi ha kapulisan syuwara,

Hi abuya amaon nila pa kubol nagpa agad kanila.

Iyasuboh sin police in magulang,

Mayta ha tuh adlaw sila ha kubol kimukulang,

Wayruon pagkaon iban mainum,

Sah sakit kanila way kimugdan.

Laung pa sin bata2x babae,

Aun magkari kamu usog badjo puti,

Bayhuh niya masilaw,maraw in pangatay'e

In siya pungutan mamanis pang uyumi,

Pagdahan ako tubig iban pagkaun ka'agi.

Police balik imasubo,

Pagka ikaw aun pagkaon, in manghud mo paano?

Bata2x balik simambung kailu,

Hi inah magbangun pagpaduruon hi utoh,

Ampa siya balik matug bang makansub hi utoh.

Amura in kapan'yabut sin mga tao,

Mahunit kahagarun in diyungog nila yadtu,

Sah amura in kasagbut nila pa ngan sin Allah.

“La ilaha illallah la hawla wala kuwata illah billah”

Police wayruon nagbalih,

Mga bata2x kaagi mamuting dih manjari,

Amaon iban asawa kiyawa nila kaagi,

Piya-alup ha kabataan way piyahuli.

Amaon kiyublaan sin kitah,

Anakun karuwa buhi ha alupan niya,

Tuh adlaw na in limabay sin kakubol niya,

Way ako nag himangkan sila buhi pa.

Wayruon limugay amaon kiyahatulan,

Asal bang ha hula arab sariah hilabay,

Amaon iban asawa amura in kahagpay,

Inigan O sila nag-aabay.

Ini balik in patumtum,

Anduh ayaw kita niyu dumungog sin fitnah,

Bisan pa asawa,anak iban amah,

Bang dih hikarayaw hika-langgal sin sara'h.

Patumtum ini katuh katan,

Ayaw tuod kita niyu lumanggal sin da'akan sin Tuhan,

Bang aun magkalagihan sin tabang natuh tuwan,

Anduh bisan san Duwaa ra kuman..

Mahuli..

Wa badu wassalamu Alaykom warahmatullahi wa barakatu.

Anak Ilo Part 1

Anak Ilo Part-1

By: Hadznalyn B. Asakil

Bismillah ko tagnaan

Salam pa mga kataymanghuran,

Yari aun kissa kaingatan,

Liyabay pa Tarasul iban Daman.

Kissa ini kiya- istori,

Naghappen ha hula arab kakasi,

Anak ilo way inah kaagi,

Kiyabin ha lima sin amah,way naparuli.

Usog2x bata-bata ilo,

Nawapat in inah anduh kailo,

Amah naka-asawa puas mayan sin pito,

Asawa mangi addat,bata2x hikasakit kunoh O.

Ha wala limugay,asawa sin amah nagburus,

Tahon limabay,nakapusaka duwa in taud;

Bata-bata ilo amura in ka'atud,

Hi auntie dugaing in pagdah kanya tuod.

Bata-bata limagguh ha lima sin mag-iipat,

In amah ka'agi magdungog ha asawa bisan unu mumpa'at,

Bisan in pagkaun maharap dih na,

Pangannal niya hati marayaw in na'asawa.

Maka-ulong in bata-bata anak ilo,

Ha mag-iipat magtug,magbatih kailu,

Wayruon bilik jatu amura ha semento,

Bukon biyah sin duwa anak hi amah niya yadtu;

Ha kutson iban aircon masarap kakulang sin baran iban O.

Dimatung man in adlaw asawa sin amah,nag-party,

Kahagad nakaw sin bata magkahagad bisan unu in hi agi,

Dihilan sin auntie pakaunon ka'agi,

Sah dih paguwaun ha garden party,

Pakaunon didtu ha taykud kusina bat way makahati.

Bata-bata umbol 'tuh tahon kimahagad,

Ha mabugah pag-amahan siya piyataykud-kusina,

Dih nakaw istorihan aun waktu ha hula Saudi Arabia,

Ha lugar Qasim aun sumuhon mahaggut in dunya.

Naubus ma yan in party,

Amah iban asawa piyabilik himali-hali,

Wayruon na bisan kitah in anak ilo ka'agi,

Huwat-huwat yadtu ha nag-iipat way nang-hati'hati.

Amah iban asawa nakatug nah,

Nakalaum mayan in tug nila kaduwa,

Amah nanagainup ha asawa naka-una,

Laung sin asawa "In amana ko hawnu na?."

Amah nakabatih,asawa piyukaw,

Batih kaw dayang,hi utoh hariin na,

Agi sin asawa yadtu ra ba kay yaya,

Yadtu natutug bisan kitaon mo pa.

Amah way panghati ha akkal sin na'asawa,

Kimahagad na adja bat laung niya natutug da,

Amah kimulang balik,natug na,

Nanagainup balik hal sin asawa naka-una

Iban pagyan "Anduh Dayang amana ko kiyawah ko na."

Nakalungkahad in amah nag-us-us,

Biyatih in asawa iban pagtaas tingug,

Batih kaw kunoh,hi utoh hawnu tungod?,

Asawa kiyublaan agi,"maray ba natutug.

E-mus'us in amah kiyadtu in mag-iipat,

Amura in katangis,anak way ha mag-iipat,

Iyasubo in asawa bang anak hawnu na,

Amura in kaiyan "piyakaun ko ha taykud kusina".

Amah dimagan pa lawang imukab,

Atay nakapa-langit pagkitah ha anak,

Anak nagkukulang simud hipoh sin kaunun naglalagab,

Naglalagab hal sin bukal ha simud timataptap,

Anak nawapat sin lassun,giyanapan pa sin haggut way bisan tamungon.

Amah napunong pagkitah ha anak,

Amuna hati in agi sin asawa naka-una kanya,

Amana kiyawa pagyanun,amun anak nila,

Amah nag-suson ha pagpasad niya.

Ini patumtum sin Allah,

Anduh ayaw mo tuod siya'siyaha,

Anak ilo,anak yatim kaulungi sila,

Amupa in makarah kaymu pa jannah.

Patumtum muna-muna pa baran ko,

Oh' manusiya pa balo-bituwanan kamu,

Ayaw niyu tuod laugi in amana binin kanyu,

Bisan aun na bahgu paghulah niyu.

(Based ha bunnal story mga taymanghud naghappened ha KSA,Qasim)

Wa'badu wassalamu alaikom wa rahmatullahi wa barakatu.

Facebook-Fitnah Book

Facebook-FITNA BOOK

By: Hadznalyn Asakil

Salam kakasi pa tiranan

Yari ako sumalam-salam kanyu tuan,

Maaf da kuman liyugayan way nakadihil himumungan,

Ha sabab nabusy kita landuh hal pag-usahan.

Yari nanalam-salam balik kanyu,

Dumihil panumtum kalu tumudju,

Tagnaan ko bismillah ha ngan sin Tag-ipun ta niyu,

Aun ini tarasul nabaktul pag-sawhan ta niyu.

Tarasul ko ini kiyamawduan FB,

Amuna bilu-bilu color taga letter F,

Kahiligan sin kabataan sambil kamaasan,

Status way ag,dih misan mamikilan.

Status didtu,status dii,

Way natuh natali bang unu tuod in meaning sin FB,

Hal bang ako in kumitah kadihilan ko meaning ini,

Bukon na baha facebook bat nahinang na FitnahBook.

Naiyan ko fitnahbook hal sin mga status,

Bisan bukon tupot yanun,yadtu ra piyu-post,

Yadtu in dugal,aggot iban maka-kugkug,

Sambil patta lumingkat,makaibug-ibog

Bukon in dii nangudju'e

Hal sin ako aun waktu magpaka-status dih pahuli,

Sah sarang natuh kitaun,bang status makamulahi,

Aun halgah atawa kakawaan fitnah sin mga tao kakasi.

Maraw bang status mo hal patumtum,

Patumtum hal sin pag-agama natuh magduruhon,

Bukon amin dugal mo ha tao,

Itungan mo hi status pidpid in lima bukton.

Maun sab kita ha mga nagpa-patta,

Nabassa nyu baha in tarasul sin kakasi Fatima Rizza May,

Amin pagyanun camera 360?,

Bisan in maampugon mahinang kumalah.

Wayrun san problema in mag-status,mag-pattah,

Sah ayaw naman kailu minute-minute aun gimuguwa,

Aun status iban patta nagdudurah,

Hal sin kaibanan news feed nila kunoh  nagbabaha.

Wayrun problema hal sin FB mo yan,

Way magpakialam sambat mo personal yan,

Sah mabayah kaw,ikaw in pasalan?

Fitna ha FB kimugdan.

Adlaw mahuli maasuboh da sakaw,

Bang unu in hinang mo ha dunya, ha FB ngtampisaw,

Ha FB na adja baha hangka adlaw,

Pag-agama piyasaran,liyupa,anduh makahanggaw.

Aun isab sumuhon magpost in mag-tiyaun,

Maaf da kuman,tuan ayaw puhon,

Pattah niyu nag-huhulid,way bisan agun tamungon,

Anduh kailu kasipugan kanyu dumatung.

Yaun pa in kaibanan kabudjangan,

Bunnal ka naka-hijab ha profile sah ha album buhok hiyahablay,

Yaun na in nagkukulihsong sin ilong,dila ha guwa iya'abay,

Anduh bangsa Fatima halgae nyu in baran bat way ma-fitnah.

Wayruon na san tuod ma'amo,

Pag-turong niyu bukon adja aun waktu,

Post ha FB kunsum naka-cover kamu,

Daih-daih mayan makapost,piyapakitah in awrat niyu.

Maaf da kuman in dii nagpatumtum,

Bukon adja kamu lamud sambil baran ko,

Kalu ra mayan kita niyu humundong,

Pag post ha FB madtu mari dih maitung.

Maaf da kuman mga tuan,

Yari kami nang hulog pikilan,

Kalu baha kamu dumungog aun kaputan,

Fitnah ha FB anduh layuan.

Wa'badu wassalamu alaikom wa rahmatullahi wa barakatu.

Pagmabugah ha maas

Pagmabugah ha Maas

By: Hadznalyn Asakil



Bismillah ko tagnaan,

Salam kasilasa pa tiranan,

Tarasol iban daman biyaktul panumtuman,

Pag-mabugah ha maas kiyamaw'duan.

Tarasol ini tungod pa maas,

Bang ko kitaon in masa bihaon tantu naluppas,

Pagmabugah pa maas way na timatas;

Halaum taas tingug,nagsisilawak.

Dungog kamu stori sin kaibanan,

Maas nawapat sadja halaum kasigpitan,

Sigpit sin daghal,hapdus'luha napakpak,

In mga ka'anakan,pa maas way na addat.

Unuhon na baha in baran mo,

Nawapat na adja hi inah iban amah mo,

Minuwi pa rahmah sin Tuhan,

Halaum sakit atay,kasusahan.

Ikaw anak,ayaw mag-gasud,

Tingug mo pa hanunuta,ayaw magpakusog;

Maas mo pagta'ati anduh tuod,

Sulgah mo ha huli,jannah maabot.

Sambuton ta in mga anak matugas O,

Daak hi inah amah,maka-itong maka-tu,

Sarang tang-danan kaw,sin tiyatayak kaymu,

Dagan nakaw buta-biso.

Yaon in kaibanan piya-pa-iskol marayaw,

Laung hi Amah utoh kamayah kaw,

Hi inah mo daran pagtxt-pagtawag bang naka'un nakaw,

Agi mo nag-i-iskul maraw pagkitah hati ha billiard'ran,ha sine,ha computer'an kaw.

Dih mo hikasipog in grade mo,

Tuyoh sin maas mag-paiskul kaymu,

Nakagraduate kaw puas sin doctorate mo,

Mabagsak adja ha pag panayaman mo.

Utoh-indah kaput kamu kasipugan,

Anduh pagmabugah ha maas baugbugan,

Kunsum-kuh'nisa sila manaw lugayan,

Ampa kamu tumangis,hal tungbas way nahinang.

Hangkan mga ka'anakan tungbas kamu,

Pa maas natuh,mangad'dati kita nyu,

Lasahon sila biyah way na makaliyuh,

Hasupaya in Allah,rahmah dihilan kita nyu.

Tarasol ko ini hiklad panumtum,

Bang way imamu,maaf pangayuon,

Bang limabi-kimulang,sunu'an sin ditun,

Mahuli maas anduh lasahun.

Wa badu wassalamu alaikom wa rahmatullahi wa barakatuhu.

Limbangan Ako

"Limbangan ako"
By: Hadznalyn Asakil

1.

Bismillah ko tagnaan,

Salam kasilasa pa tiranan,

Timarasol pasampay pa katan,

Kalu makadihil pamintangan.

2.

Dih ko sa hi tunay in ha pangatayan ko,

Dih hikatapok sin parasahan ko,

Bugah sin pikilan hiyarap ko,

Bang man kaingatan bang unu in jimatu.

3.

Katumtuman ko in bakas,

Namayah-mayah kaw kaku ima-apas-apas,

Pa iskul,pa bay,bisan pa liyangpas,

Miyabot na sambil nakapa-taw'maas.

4.

Kitah nakawin,na-halal duon,

Katan naglami-lami,nagkugkuyag way puhon;

Pa maas ta,lasyah napun,

Ha adlaw sin kita hambuokun.

5.

Miyabot man kita tiyahunan,

Ayaw puhon lasa ta naglugayan,

Magduruhon sambil naka-anak tuan,

Alhamdulillah,kita tiyakdil sin Tuhan.

6.

Pangannal ko katan dih mapinda,

Pag-ta'at ko kaymu,amu piyapa-unah,

Lasa ta duwa dih magbaluba,

Sah mayta bihaini kimugdan katuh lasa.

7.

Asubo ko kaymu,mayta unu nadusa ko?,

Ako nag-ta'at,nagkahagad kaymu,

Daing pa maas mo liyasa ko

Sah bihaini hati in gantih mo.

8.

Suratan ko hati in kakal'luahan,

Suratan ko in kawaan mo limbang,

Bisan bihaini in nahinang karayawan,

Way ako naghimangkan ako gantian.

9.

Na tiyaun kamu,nahambuok,

Uwi mo kamuh bukon na tibuok,

Lasa mo kaku natunga,natipok;

Hangkan adlaw mo bukon na tutug.

10.

Bukon tutug sambil pikilan mo,

Natunga na sambil budget mo,

Ganapan pa sin asawa mo batah-batah in O,

Dih na ako isturihan bang kita ma-uno.

11.

Sah bisan bihadtu lasa ko way nahagin,

Bisan pa dunhan in agi ko kaymu dugaing,

Bang kaw umasawa na,lumimbang,

Bugitan ako bisan dih nakaw tumabang.

12.

Sah bisan bihadtu in napikil ko,

Sabar-iman piyakusog ko,

Bang man sasat saytan dih umamo,

Ako tumutog bilang asawa mo.

13.

Hinangun ko katan bilang asawa mo,

Pagta'at kaymu mas palabihon ko,

Bang umabot in adlaw ko,

Way susun ha jantong ko.

14.

Mahang nakaw kamuh magguwa,

Sah hiyati ko bisan mata basah sin luha,

Napikil ko asawa mo batah-batah,

Sah bisan biyariin,bukon na san biddah.

15.

Lapit adlaw ako tumindog sumambahayang,

Hi tih'kad pa Allah bang man Iman ko kusugan,

Luha mapakpak,impit sin tangis ha ka-tigidluman,

Sah na adja hitangis in suratan.

16.

Adlaw dimatung,kami piyagkila,

Dih sa hiliyu bisan ako taga-laas na,

Lingkat namuh salih da ka-duwa,

Sah maray hati aun kitah mo kanya,yruon kaku lasa.

17.

Duon man kami na-hambuok,

Maka-iyan sab ako Masha Allah tuod,

Addat kitah ko matutuod,

Lasa niya kaymu biyah laggo bud.

18.

Bissara sin kaibanan piya-liyuh ko,

Suwaal nila kaagi "in Kalluwa nakaliyu",

Naka liyuh hal sin batah bahguh,

In asawa puon,makaulong kailo.

19.

Ha bissara niya,siyambagan ko,

Ayaw na kamu masusa bisan ya'sawahan ako,

Asal baran,kaingatan ko,

Tabukon in takdir sin Tag-ipon ko.

20.

Alhamdulillah ako nakara biyaini,

Bisan mahunit,masakit ha atay bigi,

Pi'kil ko in hawlihan,bat dih maglabi,

Kalu sungan sulgah,bisan sakit atay ha dunya bihaini.

21.

Mahuli wayna mahinang ko,

Hat ra ako asawa mo,

Sah anduh lasa pangayuon ko,

Hinanga in Parda'akan sin Allah kaymu.

22.

Parda-akan sin Allah,

Maka-duwa,upat manjari mag asawa,

Sah sarang bukon biddah in pagdah kanila,

Bang dih umamo,malingkat pa in isa-isa.

23.

Tarasul ko ini timuboh ha pikilan,

Maaf da kuman bang naka-haba in sulatan,

Sah kalu aun makawah panumtuman,

Pa mga bangsa Fatima kiyakal'luahan.

24.

Maaf da kuman mahuli,

Tarasol ko ini kalu hikapag-lagi,

Malaul man bassahun in tarasul ini,

Kalu patumtum tumutug ha jantung ka-agi.

Wassalamu Alaikom warahmatullahi wa barakatu.

Janji Nabaluba

Janji Nabaluba

By: Hadznalyn Asakil

Saran na in ako dih mo na kalasahan,

Nakalawag kaw dugaing ako giyantian,

Pangasuboh ko ha baran, "Mayta tuwan?"

Binin mo ako isa-isa,naka-pa abroad mayan.

In janji ta sin adlaw ka-ig mo,

Nagtangis pakaw,nag'lahsay sambil laway mo,

Suwaal binin mo "Anduh dayang magbalik da ako";

"Tagad adja kaw,tumipon ako,hipag pangasawa kaymu".

In tumtum kaymu iya'abay,

Dum-adlaw pipikil,sakit ha atay,

In kalasahan ko malayuh na,

Hulah naka dugaing,bang man siya dih magbaluba.

Sah janji mo nagbaluba,

Biyah sin badjuh,nabiyaning-namula,

Pangannal ko mabut in duwa'a,

Masamot maka-urol,makawin kita.

Sah landuh tuod piyagbago mo,

Biyah sapah,na dah anud in lapal mo,

Pagtext-pagtawag way na paruli mo,

Bat hati nakalawag na bahgu limbang mo.

Naka-ingat ako sin ikaw nakalawag na,

Biyah kaymu,ha abroad,hangka-hinangan mo ra,

Agun sa atay ko,baran nag'mulah,

In usog kalasahan ko,nakawah na sin iba.

Marayaw pa in limbang kiya-kawinan,

Daing sin tunang,pag-dupang way hinaran,

Puting landuh kiyakusugan,

Liyupa mo janji pa baran.

Sukod ta na hati in mabiyaini,

Butas tunang,way pag bali,

Maraw hati ko way nakawin,sakit atay dih maparuli,

Itungan sa in ako,bang na'asawa,giyanapan limbang ha huli.

Bihayaun ikaw malayuh na,

Butas na in lasa ta karuwa,

Kalu dihilan kaw rahmah sin Allah,

Suratan ko kaymu bugtuh, Alhamdulillah na hadja

Alhamdulillah,lil'lah in baran ko,

Nakatunang pa biyah usog kaymu,

Nalupa sambil janji pa maas mo,

Narupang nakaw ha lasa sin babae mo.

Katan pag tawbatan,fitnah ha baran,

Bunnal tuod bang lasa,sasat daing ha shaytan;

Kalu ini na in nadawhat sin baran,

Dusa dakula,pag-tawbatan ra kuman.

Alhamdulillah,nabutas kita,

Lasa mo kanya paruliha na adja,

Kalu suratan ko aun dumatung daing Kanya,

Harap pa maas ko,suwaal niya "Bismillah".

Tarasul ko ini nahinang ha pikilan,

Aun sumuhon maka-kugdan pa katan,

Ini in panumtuman way hinaran,

Kan utoh-indah malaggo parjaji'an.

Wassalamu alaikom wa rahmatullahi wa barakatu

.